ஜல்லிக்கட்டு சட்டத்துக்கு எதிராக சுப்ரீம் கோர்ட்டில் ‘பீட்டா’ அமைப்பு மனு

ஜல்லிக்கட்டு சட்டத்துக்கு எதிராக சுப்ரீம் கோர்ட்டில் ‘பீட்டா’ அமைப்பு மனு

ஜல்லிக்கட்டு சட்டத்துக்கு தடை விதிக்கக்கோரி ‘பீட்டா’ அமைப்பினர் நேற்று சுப்ரீம் கோர்ட்டில் ‘ரிட்’ மனு தாக்கல் செய்தனர்.
புதுடெல்லி,
தமிழக சட்டசபையில் ஒருமனதாக நிறைவேற்றப்பட்டு ஜனாதிபதியால் ஒப்புதல் வழங்கப்பட்ட ஜல்லிக்கட்டு சட்டத்துக்கு தடை விதிக்கக்கோரி ‘பீட்டா’ அமைப்பினர் நேற்று சுப்ரீம் கோர்ட்டில் ‘ரிட்’ மனு தாக்கல் செய்தனர்.
கடந்த 2014-ம் ஆண்டு மே 5-ந்தேதி ஜல்லிக்கட்டுக்கு தடை விதித்து சுப்ரீம் கோர்ட்டு வழங்கிய தீர்ப்பை தொடர்ந்து தமிழ்நாட்டில் பாரம்பரிய விளையாட்டான ஜல்லிக்கட்டு நடைபெறாத சூழல் நிலவி வந்தது. இதனால் ஜல்லிக்கட்டு மீதான தடையை நீக்க வலியுறுத்தி மாணவர்களும், இளைஞர்களும், பொதுமக்களும் பெருமளவில் திரண்டு போராட்டங்களை மேற்கொண்டனர்.
இந்த நிலையில் ஜல்லிக்கட்டு நடத்தும் வகையில், மிருகவதை தடை சட்டத்தின் சில பிரிவுகளில் திருத்தங்கள் மேற்கொண்டு தமிழக அரசு கடந்த ஜனவரி 21-ந்தேதி அவசர சட்டம் பிறப்பித்தது. அதைத்தொடர்ந்து ஜனவரி 23-ந்தேதி நடைபெற்ற சட்டசபை சிறப்பு கூட்டத்தில் ஜல்லிக்கட்டுக்கு ஆதரவான சட்ட மசோதா ஒருமனதாக நிறைவேற்றப்பட்டது. இதற்கு ஜனாதிபதி பிரணாப் முகர்ஜி ஒப்புதல் அளித்தார். இதனால் அந்த மசோதாவுக்கு சட்ட அங்கீகாரம் கிடைத்தது.
இதன் மூலம் தமிழர்களின் பாரம்பரியமான ஜல்லிக் கட்டை மீட்டெடுக்க தமிழக அரசு, அரசியல் கட்சியினர், மாணவர்கள், இளைஞர்கள், தமிழ் ஆர்வலர்கள் என பல்வேறு தரப்பினரும் அயராது மேற்கொண்ட முயற்சிக்கு வெற்றி கிடைத்தது. தமிழகத்தின் பல்வேறு இடங்களில் ஜல்லிக்கட்டு நடைபெற்றது.
இந்த நிலையில் ‘பீட்டா’ (இந்திய விலங்குகள் நல அமைப்பு) மற்றும் பல்வேறு விலங்குகள் நல அமைப்புகள், தமிழக அரசு பிறப்பித்த சட்டத்தை ரத்து செய்யக்கோரி சுப்ரீம் கோர்ட்டில் கடந்த ஜனவரி மாதம் இடைக்கால மனுக்கள் தாக்கல் செய்தன.
இந்த மனுக்களை ஜனவரி 31-ந்தேதி விசாரித்த சுப்ரீம் கோர்ட்டு நீதிபதிகள் தீபக் மிஸ்ரா, ரோகின்டன் பாலி நாரிமன் ஆகியோர் அடங்கிய அமர்வு, 2016-ம் ஆண்டு ஜனவரி 7-ந்தேதியன்று ஜல்லிக்கட்டுக்கு எதிராக பிறப்பித்த அறிவிக்கையை வாபஸ் பெற்றுக்கொள்வதற்கு மத்திய அரசுக்கு அனுமதி வழங்கினார்கள். தமிழக அரசு பிறப்பித்த சட்டத்துக்கு இடைக்கால தடை விதிக்க மறுத்தனர்.
அதே நேரத்தில் அந்த சட்ட திருத்தத்துக்கு எதிராக தாக்கல் செய்யப்பட்ட இடைக்கால மனுக்களை விசாரணைக்கு ஏற்றுக்கொண்ட நீதிபதிகள் அந்த மனுக்களை ‘ரிட்’ மனுக்களாக தாக்கல் செய்ய உத்தரவிட்டனர். மேலும் இந்த சட்டத்துக்கு தடை கோரும் மனுக்கள் மீது விளக்கம் கோரி தமிழக அரசுக்கும், மத்திய அரசுக்கும் நோட்டீஸ் அனுப்ப உத்தரவிட்டனர். பதில் அளிப்பதற்கான கால அவகாசம் எதுவும் நீதிபதிகள் குறிப்பிடவில்லை.
சுப்ரீம் கோர்ட்டின் இந்த உத்தரவு அடிப்படையில் ‘பீட்டா’ அமைப்பினர், ஜல்லிக்கட்டு நடத்தும் வகையில் தமிழக அரசு பிறப்பித்த அவசர சட்டத்தை ரத்து செய்யுமாறு கோரி சுப்ரீம் கோர்ட்டில் நேற்று ‘ரிட்’ மனு தாக்கல் செய்து உள்ளனர்.
அந்த மனுவில், தமிழக அரசின் அவசர சட்டத்தை தொடர்ந்து தமிழகத்தில் பல்வேறு இடங்களில் நடத்தப்பட்ட ஜல்லிக்கட்டில் காளைகள் மிகவும் கொடூரமான முறையில் துன்புறுத்தப்பட்டதாகவும், அது தொடர்பான விடியோ மற்றும் புகைப்பட ஆதாரங்களை தாக்கல் செய்துள்ளதாகவும் கூறி உள்ளனர்.
மேலும் இந்த அவசர சட்டம் குறுக்கு வழியில் மிருகங்களை வதை செய்ய அனுமதிக்கிறது என்றும், இதனால் காளைகள் அதிக அளவில் துன்புறுத்தப்படுவதாகவும் சில இடங்களில் மனிதர்கள் பெருமளவில் காயம் அடைந்ததாகவும், சில மரணங்கள் ஏற்பட்டு உள்ளதாகவும் மனுவில் கூறப்பட்டு உள்ளது.
தமிழக அரசின் அவசர சட்டம் ஜல்லிக்கட்டை தடை செய்த சுப்ரீம் கோர்ட்டு தீர்ப்புக்கு எதிராக அமைந்து இருப்பதால், அந்த அவசர சட்டத்தை உடனடியாக ரத்துசெய்ய வேண்டும் என்றும் மனுவில் கோரப்பட்டு உள்ளது.
இந்த செய்தி தினத் தந்தி  இருந்து.

இறைச்சிக்காக கால்நடை விற்பனை மத்திய அரசின் சட்டத் திருத்தம் : இடைக்காலத் தடை நீட்டிப்பு

மதுரை: இறைச்சிக்காக, கால்நடைகளை சந்தைகளில் விற்பனை செய்வதைத் தடை செய்யும், மத்திய அரசின் சட்டத்திருத்த புதிய விதிகளை, நடைமுறைப்படுத்த விதிக்கப்பட்ட இடைக்காலத் தடையை நீட்டித்து, உயர்நீதிமன்ற மதுரைக் கிளை உத்தரவிட்டுள்ளது.
மதுரை வழக்கறிஞர் செல்வகோமதி தாக்கல் செய்த பொதுநல மனு:
பிராணிகள் வதை தடுப்புச் சட்டம் 1960ல் கொண்டுவரப்பட்டது. இதன்படி, பிராணிகளை உணவு, ஆராய்ச்சிக்கு பயன்படுத்தலாம்.
இச்சட்டத்தில் திருத்தம் மேற்கொண்டு, புதிய விதிகளை மத்திய
சுற்றுச்சூழல் மற்றும் வனத்துறை இணைச் செயலர் மே 23 ல்
அறிவித்தார். இதன்படி மாடு, ஒட்டகம் போன்ற கால்நடைகளை இறைச்சிக்காக, சந்தைகளில் விற்பனை செய்ய தடை விதிக்கப்பட்டுள்ளது.
புதிய விதிகள்படி இவற்றை விற்பனை செய்வோர், வாங்குவோர் ‘இறைச்சிக்காக பயன்படுத்தமாட்டோம்’ என உத்தரவாதம் அளிக்க வேண்டும்.
இறைச்சிக்காக கால்நடைகளை பயன்படுத்தக்கூடாது என்ற விதிகள் ஏற்புடையதல்ல. வயதான மாடுகளை பராமரிப்பது இயலாது. மத்திய அரசின் புதிய விதிகள், மக்களின் அடிப்படை உரிமைகளை பாதிக்கும் வகையில்
உள்ளது.
பிராணிகள் வதை தடுப்புச் சட்டத்திருத்த புதிய விதிகள் சட்டவிரோதம் என அறிவித்து, ரத்து செய்ய வேண்டும். அதை நடைமுறைப்படுத்த இடைக்காலத் தடை விதிக்க
வேண்டும். இவ்வாறு செல்வகோமதி மனு
செய்திருந்தார்.
இதுபோல், மதுரை களிமங்கலம் ஆசிக் இளாகி பாவா மற்றொரு மனு செய்திருந்தார்.
மே 30 ல் கோடை விடுமுறைக்கால
நீதிபதிகள் அமர்வு,’சட்டத் திருத்தத்தின்படி புதிய விதிகளை நடைமுறைப்படுத்த இடைக்காலத் தடை விதிக்கப்படுகிறது,’ என உத்தரவிட்டது.
நீதிபதிகள் ஏ.செல்வம், என்.ஆதிநாதன் அமர்வு நேற்று விசாரித்தது.
மத்திய அரசு
வழக்கறிஞர், “பதில் மனு தாக்கல் செய்ய கால
அவகாசம் தேவை,” என்றார். இதை ஏற்ற
நீதிபதிகள், இடைக்காலத் தடையை ஜூலை 7வரை நீட்டித்து, விசாரணையை ஒத்திவைத்தனர்.

இந்த செய்தி தினமலர் இனையதளதில் இருந்து.

பீட்டாவுக்கு வசதியாக மாறிய சட்டம் – ஜல்லிக்கட்டு நடப்பது சந்தேகம்!

logo

பீட்டாவுக்கு வசதியாக மாறிய சட்டம் - ஜல்லிக்கட்டு நடப்பது சந்தேகம்!May 26, 2017  05:49 pm

காளை மாடுகளின் கொம்புகளில் வர்ணம் பூசுவதை கூட மத்திய அரசின் புதிய விதிமுறை தடுத்து நிறுத்தியுள்ளது.

இதன்படி பார்த்தால் இனிமேல் ஜல்லிக்கட்டு நடைபெறுவது கேள்விக் குறியாகியுள்ளது.

மத்திய சுற்றுச்சூழல் துறை அமைச்சகம் இன்று வெளியிட்டுள்ள புதிய அறிவிக்கையில், 1960ம் ஆண்டு, மிருகவதை தடுப்பு சட்டத்தில் திருத்தம் கொண்டுவந்து புதிய உத்தரவு பிறப்பிக்கப்பட்டுள்ளது.

இதன்படி, இனிமேல், மாடுகளைஇறைச்சிக்காக விற்பனை செய்ய முடியாது.

இந்த விதிமுறையில் பல்வேறு கெடுபிடிகள் விதிக்கப்பட்டுள்ளன.

பசு, காளை, ஒட்டகம், எருமைமாடு போன்றவற்றை சிறிதளவும் கொடுமைப்படுத்திவிட கூடாது என்பதே விதிமுறை சாராம்சம்.

விசித்திரம், வேதனை இந்த அடிப்படையில் ஒரு விசித்திர விதிமுறையை மத்திய அரசு பிறப்பித்துள்ளது.

அதாவது பசு மற்றும் காளைகளின் கொம்புகளில் பெயிண்ட் அடிப்பது கூட குற்றம்தானாம். இவ்வாறு செய்வோருக்கு சிறை தண்டனை கூட கிடைக்கும்.

மழையில் மாடு நனையக் கூடாதாம் மழையில் மாடு நனையக் கூடாதாம் மாடுகளுக்கு அலங்காரம் செய்வது, ஆபரணங்கள் அணிவிப்பது (தமிழ் விவசாயிகளின் பாரம்பரிய வழக்கம் இது), ஆகியவற்றையும் அரசு தடை செய்துள்ளது.

இந்த கால்நடைகளை வளர்ப்பவர் அதை கண்ணும் கருத்துமாக பார்த்துக்கொள்ள வேண்டும்.

மோசமான வானிலையில் இந்த கால்நடைகளை இருக்க விடக்கூடாது (அப்படியானால் வெயில், மழை காலத்தில் தொழுவத்தில் எப்படி மாடுகளை கட்டுவார்கள்?).

ஜல்லிக்கட்டு ஜல்லிக்கட்டு இப்படி விதிமுறைகளை அடுக்கிக்கொண்டே போகிறது மத்திய அரசு. இதில் கவனிக்க வேண்டியது என்னவென்றால், மழை, வெயில் கூட படாமல் மாட்டை பாதுகாக்க சட்டம் சொல்கிறதே அப்படியானால் அதை பிடித்து மேலே தொங்கியபடி அடக்கும் ஜல்லிக்கட்டு நிலைமை என்னவாகும்?

இந்த செய்தி முதன்மை செய்தி  சேவையில் இருந்து.

கீரிப்பட்டியில் ஜல்லிக்கட்டு விழா

Published on : 07th May 2017 08:47 AM  

கீரிப்பட்டியில் ஜல்லிக்கட்டு விழா சனிக்கிழமை விமரிசையாக நடைபெற்றது.
சேலம் மாவட்டம், மல்லியகரையை அடுத்த கீரிப்பட்டியில் ஜல்லிக்கட்டு விழா விமரிசையாக நடைபெற்றது. பல ஆண்டுகளுக்கு பிறகு நடைபெற்ற ஜல்லிக்கட்டில் மதுரை,திருச்சி, புதுக்கோட்டை, மணப்பாறை, கூடமலை, கொண்டயம்பள்ளி, தம்மம்பட்டி, ஈரோடு, காங்கயம் உள்ளிட்ட இடங்களில் இருந்து சுமார் 500-க்கும் மேற்பட்ட காளைகள் கலந்து கொண்டன.
இதே போல திருச்சி, மதுரை, மணப்பாறை உள்ளிட்ட இடங்களில் இருந்து மாடுபிடி வீரர்கள் 550 பேர் கலந்து கொண்டனர். ஜல்லிக்கட்டில் கலந்து கொண்ட சிறந்த மாடுகளுக்கும் பரிசுகள் வழங்கப்பட்டன.
மாடுகளில் தங்கக் காசு, தங்கச் சங்கிலி, வெள்ளி அரைஞாண்கயிறு, பட்டுவேட்டி உள்ளிட்ட ஏராளமான பரிசுப் பொருள்களை கட்டியிருந்தனர். அதே போல் மாடுபிடிவீரர்களுக்கு சிறப்புப் பரிசுகளும் வழங்கப்பட்டன.
ஜல்லிக்கட்டில் மாடுபிடி வீரர்கள் சுமார் 20-க்கும் மேற்பட்டோருக்கு சிறுகாயங்கள் ஏற்பட்டதால் அரசு மருத்துவமனையில் சிகிச்சை பெற்று திரும்பினர்.
மேலும், ஜல்லிக்கட்டு விழாவையொட்டி ஆத்தூர் காவல் துணைக் கண்காணிப்பாளர் ஆர்.பொன்கார்த்திக்குமார் தலைமையில் மல்லியகரை காவல் ஆய்வாளர் (பொ) தட்சிணாமூர்த்தி, ஆத்தூர் காவல் ஆய்வாளர் கேசவன், தலைவாசல் காவல் ஆய்வாளர் எஸ்.செல்வராஜ் மற்றும் நூற்றுக்கும் மேற்பட்ட போலீஸார் பாதுகாப்புப் பணியில் ஈடுபட்டிருந்தனர்.

இந்த செய்தி தினமணி இனைதளத்தில் இருந்து.

புள்ளம்பாடியில் ஜல்லிக்கட்டு: 700 காளைகள் பங்கேற்பு; 15 பேர் காயம்

Published on : 17th May 2017 06:19 AM    

திருச்சி மாவட்டம், புள்ளம்பாடியில் செவ்வாய்க்கிழமை ஜல்லிக்கட்டு நடைபெற்றது. இதில் 700-க்கும் மேற்பட்ட காளைகள் பங்கேற்றன. காளைகளை அடக்க முயன்ற 15 மாடுபிடி வீரர்கள் காயமடைந்தனர்.

புள்ளம்பாடி பேரூராட்சி அலுவலகம் அருகேயுள்ள குளுந்தாளம்மன் கோயில் திருவிழா அண்மையில் நடைபெற்றது. இதையொட்டி, செவ்வாய்க்கிழமை ஜல்லிக்கட்டு நடைபெற்றது. இதில் ஜல்லிக்கட்டுப் பேரவை திருச்சி மாவட்ட செயலாளர் காத்தானின் 10 காளைகள் மற்றும்  அரியலூர், பெரம்பலூர், தஞ்சாவூர், சேலம், மதுரை உள்ளிட்ட மாவட்டங்களைச் சேர்ந்த 700-க்கும் மேற்பட்ட காளைகளும், 500-க்கும் மேற்பட்ட மாடுபிடி வீரர்களும் பங்கேற்றனர். காளைகளை அடக்க இளைஞர்கள் அதிக ஆர்வம் காட்டியபோதும், வாடிவாசல் வழியே வந்த பெரும்பான்மையான காளைகள் வீரர்களிடம் பிடிபடாமல் சீறி பாய்ந்து சென்றன. 15 மாடுபிடி வீரர்களுக்கு லேசான காயமேற்பட்டது. இவர்களுக்கு அந்தப் பகுதியில் இருந்த மருத்துவக் குழுவினர் சிகிச்சை அளித்தனர்.
ஜல்லிக்கட்டு உரிய விதிகளின்படி நடைபெறுகிறதா என லால்குடி வருவாய் கோட்டாட்சியர் கோவிந்தராஜுலு, வட்டாட்சியர் ஜவஹர்லால் நேரு ஆகியோர் பார்வையிட்டனர்.லால்குடி காவல் துணைக் கண்காணிப்பாளர் பேட்ரிக்  தலைமையில் 5 ஆய்வாளர்கள் உள்ளிட்ட 200 போலீஸார் பாதுகாப்பு பணியில் ஈடுபட்டனர்.
காளைகளை அடக்கிய சிறந்த வீரர்களுக்கும், வீரர்களிடம் அகப்படாமல் சென்ற காளைகளின் உரிமையாளர்களுக்கும் தங்க காசுகள், வெள்ளிக்காசுகள், சைக்கிள்கள் மற்றும் வீட்டு உபயோகப் பொருள்களை விழா குழுவினர் பரிசாக வழங்கினர்.

இந்த செய்தி தினமணி இனையதளத்தில் இருந்து.

ஜல்லிக்கட்டு போட்டி : ஜூன் முதல் தடை

பதிவு செய்த நாள்    16 மே 2017 07:33

தமிழகத்தில், ஜூன் முதல், ஏழு மாதங்களுக்கு ஜல்லிக்கட்டு நடத்த, அரசு தடை விதித்துள்ளது.

உச்ச நீதிமன்ற தடையால், தமிழகத்தில், இரு ஆண்டுகளாக ஜல்லிக்கட்டு நடத்தவில்லை. ஜல்லிக்கட்டு நடத்த வலியுறுத்தி, மாணவர்கள், இளைஞர்கள், நடப்பாண்டு ஜனவரியில் தொடர் போராட்டத்தில் ஈடுபட்டனர். இதையடுத்து, தமிழகத்தில் ஜல்லிக்கட்டுக்கு அனுமதி அளிக்கப்பட்டது. இதன்படி, விண்ணப்பங்களை பரிசீலித்து, ஏற்கனவே ஜல்லிக்கட்டு நடந்த பகுதிகளுக்கு மட்டும், கலெக்டர்கள் அனுமதி அளித்து வருகின்றனர்.

மேலும், மாநில அரசிதழில், ஜல்லிக்கட்டு நடக்கும் இடம், நாள் குறித்த விபரம் இடம் பெற்றிருக்க வேண்டும்.கடந்த காலங்களில் கோவில், சர்ச் விழாக்களை ஒட்டி, ஆண்டு முழுவதும் ஜல்லிக்கட்டு நடத்தப்பட்டது. இதன்படி, அனுமதி கேட்டு, கிராம மக்கள் தொடர்ந்து விண்ணப்பித்து வருகின்றனர். ஆனால், ஜன., – மே வரை மட்டுமே ஜல்லிக்கட்டு நடத்த அனுமதிக்க வேண்டுமென, அரசு உத்தரவிட்டு உள்ளது. இதனால், கிராம மக்கள் ஏமாற்றத்துடன் திரும்பி செல்கின்றனர்.
வருவாய் துறை அதிகாரி ஒருவர் கூறுகையில், ‘ஜூன் முதல் விவசாய பணிகள் துவங்கிவிடும் என்பதால், ஜன., – மே வரை மட்டுமே, ஜல்லிக்கட்டுக்கு அனுமதி தரப்படும். மற்ற மாதங்களுக்கு விண்ணப்பம் அளித்தால், நிராகரிக்கப்படும்’ என்றார்.

– நமது நிருபர் -தினமலர்

தமிழர்களின் பண்பாட்டு கலையான ஜல்லிக்கட்டு போட்டிக்கு எந்த தடையும் விதிக்க கூடாது: வைகோ அறிக்கை

நாள் : Apr 09 | 02:00 am   சென்னை,

தமிழர்களின் பண்பாட்டு கலையான ஜல்லிக்கட்டு போட்டிக்கு எந்த தடையும் விதிக்கக்கூடாது என்றும், அந்த போட்டிகளை நடத்துவதற்கு நானே முன்னின்று பாடுபடுவேன் என்றும் வைகோ தெரிவித்துள்ளார்.

இதுதொடர்பாக ம.தி.மு.க. பொதுச்செயலாளர் வைகோ வெளியிட்டுள்ள அறிக்கையில் கூறியிருப்பதாவது:–

பாரம்பரிய விளையாட்டு

தமிழர்களின் வீரத்தை உலகிற்கு பறைசாற்றும் பாரம்பரிய விளையாட்டான ஜல்லிக்கட்டை பல்வேறு காரணங்களை கூறி தடை ஏற்படுத்திடும் முயற்சிகள் நடைபெற்ற போதெல்லாம் அதை வன்மையாக கண்டித்தும், ஜல்லிக்கட்டு நடத்த அனுமதிக்க வேண்டும் என்றும் வலியுறுத்தி வருகிறேன்.

வளர்ந்து செழித்த ஐரோப்பா கண்டத்தின் ஸ்பெயின் நாட்டில் இன்றும் மாடுபிடி திருவிழா சிறப்பாக நடைபெற்று வருகிறது. அதில் பலரும் காயம் அடைகின்றனர்; உயிருக்கும் ஆபத்து ஏற்படுகிறது. ஆனாலும் அந்த வீர விளையாட்டு தொடர்கிறது.

உலக நாட்டு பயணிகள்

சங்க இலக்கியத்தில் ஏறு தழுவுதல் எனும் வீரக்கலை வாலிபர்களின் திருவிழா கலையாகவே திகழ்ந்தது. தமிழ்நாட்டில் பல்வேறு இடங்களில் நடைபெறும் ஜல்லிக்கட்டு நிகழ்ச்சிகளைக் காண உலக நாட்டு பயணிகள் வந்து குவிகின்றனர். இதில் பங்கேற்கும் ஜல்லிக்கட்டு காளைகளை மக்கள் கண்போல் பாதுகாத்து வருகின்றனர்.

போட்டியில் பங்கேற்கும் காளை மாடுகளுக்கு எந்த உடல் உபாதைகளும் ஏற்படுவதில்லை. ஜல்லிக்கட்டு போட்டியில் பங்கேற்போருக்கு காயம் ஏற்படுவதை காரணம் காட்டி தடை செய்வது அறிவீனம் ஆகும்.

எந்த தடையும் விதிக்கக்கூடாது

நெடுஞ்சாலையில் நாள்தோறும் நூற்றுக்கணக்கான விபத்துகளில் பலர் உயிர் இழக்கின்றனர்; காயம் அடைகின்றனர். இதற்காக சாலைகளில் வாகனங்களே ஓட்டக்கூடாது என்று அரசு சட்டம் கொண்டுவர முடியுமா? எனவே, ஜல்லிக்கட்டு போட்டிக்கு எந்த தடையும் விதிக்கக்கூடாது.

மதுரை மாவட்டத்தில், கரடிக்கல் உள்ளிட்ட பல கிராமங்களில் ஜல்லிக்கட்டு நடத்துவதற்கு அனுமதி அளிக்கப்படாததால், மக்கள் பெரும் கோபத்தில் உள்ளனர். தமிழர்களின் பண்பாட்டு கலையான ஜல்லிக்கட்டு போட்டிகளை நடத்துவதற்கு நானே முன்னின்று பாடுபடுவேன்.

இவ்வாறு அறிக்கையில் வைகோ கூறியுள்ளார்.

இந்த செய்தி ‘தின தந்தி ’ (இணையதளம்) தொகுப்பில் ஏப்ரல் 09, 2014 அன்று வெளிவந்தது !

அலங்காநல்லூரில் ஜல்லிக்கட்டு காளைகள் பதிவில் தள்ளுமுள்ளு: சுவர் இடிந்து விழுந்ததால் பரபரப்பு

பதிவு செய்த நாள் : புதன்கிழமை, ஜனவரி 08, 6:30 PM IST

அலங்காநல்லூரில் ஜல்லிக்கட்டு காளைகள் பதிவில் தள்ளுமுள்ளு: சுவர் இடிந்து விழுந்ததால் பரபரப்பு

அலங்காநல்லூர், ஜன. 8–

ஜல்லிக்கட்டு போட்டிக்கு காளைகளை பதிவு செய்ய பலரும் முண்டியடித்ததால் தள்ளு முள்ளு ஏற்பட்டது. இதனால் சுவர் இடிந்து விழுந்ததால் பரபரப்பு ஏற்பட்டது.

மதுரை மாவட்டம் அலங்காநல்லூரில் வருகிற 16–ந்தேதி ஜல்லிக்கட்டு நடைபெறுகிறது. இதை யொட்டி அங்குள்ள வருவாய் துறை அலுவலகத்தில் காளைகள் பதிவு கடந்த 6–ந்தேதி முதல் நடந்து வருகிறது.

நேற்றைய பதிவின்போது கூட்டம் அதிகமானதால் தள்ளுமுள்ளு ஏற்பட்டது. அப்போது வருவாய் துறை அலுவலக சுற்று சுவர் மீது கூட்டமாக சாய்ந்ததால் பாரம் தாங்காமல் சுவர் இடிந்து விழுந்தது. இதில் யாருக்கும் பாதிப்பு ஏற்படாமல் அதிருஷ்டவசமாக உயிர் தப்பினர்.

கடந்த 2 நாட்களாக நடந்த பதிவில் 650 காளைகள் பதிவு செய்யப்பட்டது. இதில் 250–க்கு மேற்பட்ட உள்ளுர் மற்றும் வெளி மாவட்ட காளைகளின் உரிமையாளர்கள் 2 நாட்கள் காத்திருந்தும் பதிவு செய்ய முடியாமல் அதிக வருத்தத்துடன் சென்றனர்.

மேலும் கடந்த ஆண்டு அரசு நிர்ணயித்த காலகெடுவான காலை 8மணி முதல் மதிய 2 மணிக்குள் ஜல்லிக்கட்டு முடிந்தது. எந்தவித கெடுபிடியும் இல்லாமல் மைதானத்திற்கு வந்த 519 மாடுகளில் உரிய பரிசோதனைக்கு பின்னர் 498 மாடுகள் அவிழ்க்கப்பட்டது.

இந்த வருடம் நடைபெறும் ஜல்லிக்கட்டையொட்டி கோட்டை முனிசாமி வாடிவாசல் திடல், மற்றும் வெளிநாட்டு பயணிகள் அமர்ந்து பார்த்து மகிழும் சுற்றுலாதுறை மேடை வர்ணம் பூசும் பணி நடந்துவருகிறது. இதேபோல் பாலமேட்டில் 15–ந் தேதி ஜல்லிககட்டு நடைபெறும் மஞ்சமலை ஆற்றுத்திடல் வாடிவாசல் வர்ணம் பூசும் பணியும், பார்வையாளர்கள் மேடை உள்ளிட்ட தடுப்பு வேலி அமைக்கும் பணியும் மும்முரமாக நடந்து வருகிறது.

விழா ஏற்பாடுகளை அந்தந்த ஊர்களில் விழா கமிட்டியினரும், பேருராட்சி நிர்வாகத்தினரும், கிராம பொதுமக்களும் மற்றும் வருவாய்துறை அதிகாரிகளும் கவனித்து வருகின்றனர்.

இந்த செய்தி ‘மாலை மலர் ’ (இணையதளம்) தொகுப்பில் ஜனவரி 08, 2014 அன்று வெளிவந்தது !

பாலக்குறிச்சி ஆவாரங்காடு ஜல்லிக்கட்டு ஏற்பாடுகளை ஸ்ரீரங்கம் ஆர்டிஓ ஆய்வு

பதிவு செய்த நேரம்:2014-01-08 10:50:26

துவரங்குறிச்சி, :  துவரங்குறிச்சி அருகே பாலக்குறிச்சி ஆவாரங்காடு, பொன்னர்சங்கர் கோயில் திடலில் நடைபெற்று வரும் ஜல்லிக்கட்டு ஏற்பாடுகளை ஸ்ரீரங்கம் ஆர்டிஓ ஜனனிசெளந்தர்யா ஆய்வு செய்தார்.
பாலக்குறிச்சி ஆவாரங்காடு, பொன்னர்சங்கர் கோயில் திடலில் ஒவ்வொரு வருடமும் மாட்டுப்பொங்கலுக்கு மறுநாள் பாலக்குறிச்சி கலிங்கப்பட்டி, சோலையம்மாபட்டி, கீரணிப்பட்டி, ஆகிய பகுதிகளைச் சேர்ந்த பொதுமக்கள் ஜல்லிக்கட்டு நடத்துவது வழக்கம். இந்த ஜல்லிக்கட்டு மதுரை அலங்காநல்லூர் ஜல்லிக்கட்டைவிட சிறப்பு வாய்ந்தது. இதில் ஏராளமான காளைகள் பங்கேற்பதால் தமிழகம் முழுவதிலும் இருந்து ஏராளமானோர் பங்கேற்பர். இந்த வருடம் மதுரை உயர்நீதி மன்றக்கிளை உத்தரவின்படி வழக்கம்போல் ஜல்லிக்கட்டு நடைபெறுவதற்கான அனைத்து ஏற்பாடுகளும் இரவு பகலாக நடந்து வருகிறது.
பாலக்குறிச்சி கலிங்கப்பட்டி, சோலையம்மாபட்டி, கீரணிப்பட்டி, ஆகிய பகுதிகளைச் சேர்ந்த பொதுமக்கள், ஆவாரங்காடு ஜல்லிக்கட்டின்போது தங்களுடைய நேர்த்தி கடனுக்காக திருச்சி, புதுக்கோட்டை, சிவகங்கை, ராமநாதபுரம், தஞ்சாவூர், மதுரை, திண்டுக்கல், உள்ளிட்ட பகுதிகளில் உள்ள ஜல்லிக்கட்டு காளைகளுக்கு பாக்கு வைத்து ஆவாரங்காடு ஜல்லிக்கட்டுக்கு அழைத்து வருவது வழக்கமாகும்.
இந்த ஜல்லிக்கட்டில் பிடிபடாத காளைகளுக்கு தங்க நாணயம், பீரோ, கட்டில், வெள்ளிக்காசுகள், எவர்சில்வர் பொருட்கள், சைக்கிள் உள்ளிட்ட ஏராளமான பரிசுப்பொருட்கள் வழங்கப்படும். இதில் சுமார் 700க்கும் மேற்பட்ட காளைகளும் 300க்கும் மேற்பட்ட காளையை அடக்கும் வீரர்களும் கலந்து கொள்வார்கள் என எதிர்பார்க்கப்படுகிறது. மேலும் இன்று முதல் ஜல்லிக்கட்டில் கலந்துகொள்ளும் காளைகளுக்கு முன்பதிவு செய்யப்படுகிறது. இதில் 10000 மேற்பட்ட பார்வையாளர்கள் அமர இருபுறமும் கேலரிகள் அமைக்கும் பணி இரவு பகலாக நடந்து வருகிறது. இந்த ஜல்லிக்கட்டு ஜனவரி16ம் தேதி காலை 10மணிக்கு தொடங்கி மாலை 4 மணி வரை நடைபெறுகிறது.
இதுகுறித்த பாதுகாப்பு ஏற்பாடுகளை ஸ்ரீரங்கம் ஆர்டிஓ ஜனனிசெளந்தர்யா பார்வையிட்டு குறைபாடுகளை சுட்டிக்காட்டி சரிசெய்ய உத்தரவிட்டார். அப்போது மருங்காபுரி தாசில்தார் சுலோச்சனா, மணப்பாறை டிஎஸ்பி.கணேசன், வளநாடு எஸ்ஐ அம்பிகா, மற்றும் சுகாதாரத்துறை, கால்நடைத்துறை, தீயணைப்புத்துறை ஆகியவற்றின் அதிகாரிகள் உடனிருந்தனர்.

இந்த செய்தி ‘தினகரன்’ (இணையதளம்) திருச்சி  தொகுப்பில்  2014-01-08  அன்று வெளிவந்தது !

மல்லுக்கட்டு இன்றி நடக்குமா ஜல்லிக்கட்டு – முட்டுக்கட்டை போட முயற்சிகள் மும்முரம்

மதுரை : தை பொங்கல் பண்டிகை நெருங்கும் நிலையில் ஜல்லிக்கட்டுக்காக காளைகளுக்கு பயிற்சி அளித்து தயார்படுத்தும் பணிகள் விறுவிறுப்பாக நடக்கின்றன. இதற்கிடையே ஜல்லிக்கட்டுக்கு மீண்டும் முட்டுக்கட்டை போட தீவிர முயற்சிகள் நடப்பதால் தடங்கலின்றி நடக்குமா என்ற ஐயமும் எழுந்துள்ளது. ஜல்லிக்கட்டு… தமிழகத்தில் 400 ஆண்டுகளுக்கும் மேலாக நடைபெற்று வரும் வீர விளையாட்டு. தமிழர் திருநாளான பொங்கல் பண்டிகை, கிராம கோயில் திருவிழா, சிவராத்திரி திருவிழாவை முன்னிட்டு நடத்தப்பட்டு வருகிறது. ஆடுகளத்தில் சீறிப்பாயும் முரட்டு காளையை அடக்கும் வீரர்களுக்கு பொன்னும், பொருளும் பரிசாக அளிக்கப்படும்.

அடக்க முடியாவிட்டால், அஞ்சாத காளை என புகழ்ந்து அதற்கு பரிசளிக்கப்படும். தமிழர்களின் பாரம்பரியமான இந்த வீர விளையாட்டு கிராம கோயில் திருவிழா வழிபாட்டில் ஒன்றாக நம்பப்படுகிறது.தமிழகத்தில் 650க்கும் மேற்பட்ட ஊர்களில் ஜல்லிக்கட்டு நடந்து வந்தது. மதுரை, அலங்காநல்லூர் ஜல்லிக்கட்டு உலகத்தையே கவர்ந்து இழுக்கும் சிறப்பு பெற்றது.தமிழர்களின் பாரம்பரிய வீர விளையாட்டான ஜல்லிக்கட்டை நடக்க விடாமல் முடக்கி போடும் திட்டத்துடன் 6 ஆண்டுகளுக்கு முன் விலங்குகள் நல சங்கம் சார்பில் முன்னாள் மத்திய அமைச்சர் மேனகாகாந்தி உச்சநீதிமன்றத்தில் வழக்கு போட்டார். அன்றைக்கு எழுந்த சோதனை இன்னும் முழுமையாக நீங்காமல் சோதனை மேல் சோதனையாக நீடிக்கிறது.

உச்சநீதிமன்ற வழிகாட்டுதலின்படி ஜல்லிக்கட்டுக்கு தமிழக அரசு அங்கீகாரம் அளித்து 2009ல் தனி சட்டம் இயற்றியது. இதை தொடர்ந்து உச்சநீதிமன்றத்தின் கடும் நிபந்தனைகளுடன் ஜல்லிக்கட்டு நடத்த அனுமதிக்கப்பட்டது. இதன் பிறகு இந்தி நடிகை ஹேமமாலினி ஜல்லிக்கட்டுக்கு தடை விதிக்க வேண்டுமென கொடி தூக்கி மத்திய அரசுக்கு கடிதம் எழுதினார். இதனால் சர்க்கசில் புலி, சிங்கம், கரடிகளுக்கு தடை விதிக்கப்பட்டது போல் விலங்குகள் பட்டியலில் காளையையும் சேர்த்து 2011ல் மத்திய அரசு பிறப்பித்த உத்தரவு பெரும் தடங்கலை உண்டாக்கியது. இதை மாவட்ட கலெக்டர்களுக்கு சுற்றறிக்கையாக அனுப்பி வைத்தது.

ஆனால் ஏற்கனவே உச்சநீதிமன்றம் அளித்துள்ள வழிகாட்டுதலை பின்பற்றும்படி தமிழக அரசு அறிவுறுத்தியது. இதன்பேரில் மாவட்ட கலெக்டர்கள் விருப்பப்படி முடிவுகள் எடுக்கப்பட்டன. சில கலெக்டர்கள் 77 நிபந்தனைகள் விதித்து அனுமதி வழங்கினர். சில கலெக்டர்கள் நீதிமன்றத்தில் அனுமதி பெற்றுக் கொள்ளும்படி நழுவினர்.கடந்தமுறை கடும் கட்டுப்பாடுகளுடன் நடைபெற்ற ஜல்லிக்கட்டுகள் சிறப்பாக நடந்து முடிந்துள்ளன. சில ஊர்களில் கட்டுப்பாடுகள் மீறிய ஜல்லிக்கட்டு, மஞ்சு விரட்டுகளில் உயிர்பலிகள் ஏற்பட்டுள்ளன. காளைகளும் சித்ரவதை செய்யப்பட் டதாகவும், விதிமீறல்கள் நடைபெற்றதாகவும் பிராணிகள் நல வாரியம் புகார் தெரிவித்து மீண்டும் ஜல்லிக்கட்டுக்கு முட்டுக்கட்டை போட முயற்சி மேற்கொண்டுள்ளது.

இதற்காக, முந்தைய ஜல்லிக்கட்டு, மஞ்சு விரட்டுகளில் பலியானோர், காளைகள் சித்ரவதை காட்சி வீடியோ, கட்டுப்பாடு மீறல் குறித்து பட்டியல் தயாரித்துள்ளது. மேனகா காந்தியும், ஹேமமாலினியும் இந்த முயற்சியில் ஈடுபட்டுள்ளதாக ஜல்லிக்கட்டு ஆர்வலர் கள் அஞ்சுகிறார்கள். காளையை விலங்குகள் பட்டியலில் சேர்த்து தடை விதித்த மத்திய அமைச்சரின் உத்தரவும் ரத்து செய்யப்படாமல் 2 ஆண்டுகளாக நீடிக்கிறது. இதை ஒரு ஆயுதமாக கையில் தூக்கிக் கொண்டு மிரட்டுவதாக அஞ்சப்படுகிறது.

ஜல்லிக்கட்டுக்கு ஒரு மாதத்திற்கு முன் கலெக்டரிடம் அனுமதி கேட்டு மனு அளிக்க வேண்டும் என்பது நிபந்தனை. அதன்படி வரும் பொங்கல் பண்டிகையை முன்னிட்டு ஜனவரி 14ல் மதுரை அவனியாபுரம், 15ல் மதுரை பாலமேடு, 16ல் உலகபுகழ் பெற்ற மதுரை அலங்காநல்லூர் ஜல்லிக்கட்டு அனுமதி கேட்டு மாவட்ட கலெக்டர் சுப்பிரமணியனிடம் மனு அளிக்கப்பட்டு விட்டது.ஜல்லிக்கட்டுக்காக மதுரை, தேனி, திண்டுக்கல், சிவகங்கை, ராமநாதபுரம், விருதுநகர், திருச்சி, புதுக்கோட்டை, தஞ்சாவூர் உள்ளிட்ட பல்வேறு மாவட்டங்களில் முரட்டு காளைகள் தயாராகி வருகின்றன. சத்துள்ள தீவனம், நீச்சல் பயிற்சி, தோட்டங்களில் மணல் மேட்டில் முட்டி மோதுதல் உள்ளிட்ட சிறப்பு பயிற்சிகளும் அளிக்கப்படுன்றன.

இதேபோல் காளையை அடக்க காளையர்களும் சிறப்பு பயிற்சி பெற்று ஜரூராகி வருகின்றனர். ஜல்லிக்கட்டுக்கு 6 ஆண்டுகளாக ஏதாவது ஒரு சோதனை எழுந்து, தடங்கல் ஏற்படுவதும், கடைசி நேரத்தில் நீங்குவதுமான நிலையே நீடிக்கிறது. கடுமையான கட்டுப்பாடுகளால் 400க்கும் மேற்பட்ட ஊர்களில் ஜல்லிக்கட்டு முற்றிலும் தடைபட்டு போனது. எனவே தற்போது நிபந்தனைகளுக்கு கட்டுப்பட்டு நடக்கும் ஜல்லிக்கட்டுக்கு அடுத்தடுத்து தடங்கல் ஏற்படுமோ என்ற அச்சமும் நிலவுகிறது.

எது சித்ரவதை?
ஸ்பெயின், தென் அமெரிக்கா, தென்கொரியா போன்ற நாடுகளில் காளைகளுடன் சண்டையிட்டு அடக்கும் பந்தயங்கள் நடக்கின்றன. வட்ட வடிவமான அரங்கில் காளைகள் திறந்து விடப்படும். வீரர்கள் குதிரையில் அமர்ந்தபடி காளை மீது ஈட்டிகளை வீசி, அது தளர்ந்ததும், அதன் முகத்தின் முன் வண்ணத் துணிகளை காட்டியபடி வாளை பாய்ச்சி கொல்வார்கள். அது சித்ரவதை. ஜல்லிக்கட்டில் காளைகள் ஆடுகளத்தில் இறங்கியதும் ஓரிரு நிமிடங்களில் துள்ளி பாய்ந்தபடி ஓடிவிடும். அதற்குள் திமிலை பிடித்து அடக்க வேண்டும். அதோடு முடிந்தது.

மிரட்டும் ஹேமமாலினி
ஜல்லிக்கட்டுக்கு எதிராக மேனகா காந்தியை தொடர்ந்து தமிழகத்தை சேர்ந்த இந்தி நடிகை ஹேமமாலினி தூக்கிய கொடியை கீழே போடவில்லை. மத்திய அரசுக்கு மீண்டும் கடிதம் எழுதி தடுக்க முயற்சிப்பதாகவும், இதற்காக பிராணிகள் நல வாரியத்தில் இருந்து தகவல்களை கேட்டு பெற்றுள்ளதாகவும் ஜல்லிக்கட்டு ஆர்வலர்கள் மத்தியில் அச்சம் எழுந்துள்ளது.

இந்த செய்தி ‘தினகரன்’ (இணையதளம்) தொகுப்பில் 2013-12-23 அன்று வெளிவந்தது !

தமிழனின் வீர மரபு !

%d bloggers like this: